غزہ میں اسرائیلی بربریت جاری، بھوک سے تڑپتے مزید 104 فلسطینی شہید

غزہ: اسرائیلی فوج کی جارحیت کا سلسلہ جاری ہے، جس کے نتیجے میں آج مزید 104 فلسطینی شہید ہو گئے ہیں۔ ان میں 37 افراد رفح میں امدادی خوراک کے مراکز کے قریب جمع تھے جب انہیں نشانہ بنایا گیا۔

عالمی میڈیا کے مطابق ان تازہ حملوں کے بعد اسرائیلی جارحیت میں شہید ہونے والے فلسطینیوں کی مجموعی تعداد 58 ہزار 700 سے زائد ہو گئی ہے، جبکہ ایک لاکھ 40 ہزار سے زائد فلسطینی زخمی ہیں جن میں خواتین اور بچوں کی ایک بڑی تعداد شامل ہے۔

اقوام متحدہ کے ورلڈ فوڈ پروگرام (WFP) نے غزہ میں خوراک کی شدید قلت کی تصدیق کی ہے اور بتایا ہے کہ ہر 3 میں سے ایک شخص کئی روز سے کھانے سے محروم ہے۔

 اونروا (UNRWA) نے بھی اپنی رپورٹ میں کہا ہے کہ ان کے پاس غزہ کی آبادی کے لیے خوراک موجود ہے، لیکن اسرائیلی ناکہ بندی کی وجہ سے وہ امدادی سامان مصر کے راستے غزہ تک پہنچانے سے قاصر ہیں۔

دوسری جانب، حماس نے دعویٰ کیا ہے کہ انہوں نے ایک جنگ بندی معاہدے کی پیشکش کی تھی جس کے تحت تمام یرغمالیوں کی رہائی ممکن تھی، تاہم اسرائیل نے یہ تجویز مسترد کر دی۔ 

حماس نے خبردار کیا ہے کہ اگر معاہدہ نہ ہوا تو وہ ایک طویل جنگ کے لیے تیار ہیں۔ ادھر برطانیہ میں فلسطین ایکشن گروپ کے حق میں بڑے پیمانے پر مظاہرے ہوئے، جہاں لندن، ایڈن برگ، مانچسٹر اور برسٹل میں ہزاروں شہری سڑکوں پر نکل آئے اور فلسطین ایکشن کا نام دہشت گردوں کی فہرست سے نکالنے کا مطالبہ کیا۔