نائیجیریا کی فوج کا اپنے ہی شہریوں پر ڈرون حملہ، میلاد کی محفل میں شریک 85 افراد شہید

افریقی ملک نائیجیریا کی فوج نے باغیوں کے خلاف آپریشن کے دوران معصوم شہریوں کی جانب سے سجائی گئی میلاد النبی صلی اللہ علیہ وسلم کی تقریب پر بمباری کردی جس کے نتیجے میں 85 سے زاہد افراد شہید ہوگئے۔

بین الاقوامی میڈیا رپورٹ کے مطابق نائیجیریا کی فوج نے ڈرون حملہ اپنے ہی شہریوں پر کردیا اور جس تقریب پر یہ بم مارا گیا اُس میں 300 سے زائد افراد شامل تھے جن میں بچے اور خواتین بھی ہیں۔

نائیجیریا کی فوج نے کدونا ریاست کی کونسل ایگابی میں واقع بیری گاؤں میں جنگجو باغیوں کی ایک میٹنگ کی اطلاع پر ڈرون حملہ کر دیا لیکن وہاں میلاد النبی کی تقریب جاری تھی۔

فوج کے ترجمان نے افسوس کا اظہار کرتے ہوئے کہا کہ اس واقعے پر انکوائری کی جائے گی اور آئندہ ایسا کوئی واقعہ نہ ہونے کی یقین دہانی کرائی ہے۔ ایمنسٹی انٹرنیشنل نائیجیریا نے دعویٰ کیا کہ حملے میں 120 افراد جاں بحق ہوگئے جب کہ نیشنل ایمرجنسی منیجمنٹ ایجنسی کے مطابق 85 افراد کی تدفین کردی گئی۔