سعودی عرب : بچوں کیساتھ حج و عمرہ کرنے والوں کے لیے بڑا اعلان

سعودی حکومت کی جانب سے زائرین کی خدمت اور حفاظت میں کوئی بھی کمی یا لاپروائی سے بچنے کے لیے ایک اہم فیصلہ کیا گیا ہے۔

سعودی خبر رساں ادارے کی رپورٹ کے مطابق حج و عمرے کی سعادت حاصل کرنے کے لیے دنیا بھر سے لاکھوں فرزندگان توحید خانہ کعبہ اور مسجد نبوی صلی اللہ علیہ وآلہ وسلم آتے ہیں۔

بہت زیادہ رش اور گرمی کے باعث بچوں کی حفاظت سب سے بڑا چیلنج بن گیا ہے۔ لاکھوں افراد کے درمیان بچوں کا والدین سے بچھڑ جانا ایک تکلیف دہ عمل ہوتا ہے۔

خادمین حریمین شریفین کی ہدایت پر اس مشکل سے نمٹنے کے لیے مسجد الحرام اور مسجدِ نبوی میں بچوں کو خصوصی سیفٹی رِسٹ بینڈز پہنائے جائیں گے۔

رپورٹس کے مطابق اس بات کا اعلان مسجد الحرام اور مسجد نبوی صلی اللہ علیہ وآلہ وسلم کے امور کی دیکھ بھال کرنے والی جنرل اتھارٹی کے حکام نے کیا۔

کلائی پر بندھنے والے اس اسمارٹ رسٹ بینڈ میں والدین اور سرپرستوں کی تمام تفصیلات موجود ہوں گی۔

اس طرح کسی بچے کے والدین سے بچھڑجانے یا گم ہونے کی صورت میں فوری شناخت ممکن ہوسکے گی اور والدین کو تلاش کرکے بچہ حوالے کیا جاسکے گا۔