اسماعیل ہنیہ کی شہادت کے بعد ایرانی سپریم لیڈر کا اسرائیل پر براہ راست حملے کا حکم

ایران کے سپریم لیڈر آیت اللّٰہ خامنہ ای نے حماس کے رہنما اسماعیل ہنیہ کی شہادت کا بدلہ لینے کیلیے اسرائیل پر براہ راست حملے کا حکم دیدیا ہے۔

امریکی اخبار کا دعویٰ ہے کہ آیت اللّٰہ خامنہ ای نے یہ حکم ایران کی سپریم نیشنل سیکیورٹی کونسل کے ہنگامی اجلاس میں دیا جو کہ اسماعیل ہنیہ کی شہادت کے فوری بعد منعقد کیا گیا تھا۔ 

سپریم لیڈر نے کہا کہ اسرائیل نے تہران میں حملہ کر کے اپنے لیے زمین تنگ کرنے کی راہ ہموار کی ہے۔

حماس رہنما کی نماز جنازہ آج تہران میں ادا کی جائے گی جبکہ انکی تدفین قطر میں جمعے کو نماز جنازہ کی ادائیگی کے بعد ہوگی۔

عالمی سربراہان نے حماس رہنما پر حملے پر شدید ردعمل جاری کرتے ہوئے اسے نئی جنگ کا شاخسانہ قرار دیا ہے۔