سانحہ ورلڈ ٹریڈ سینٹر میں کئی سالوں بعد بڑی پیشرفت

امریکا کے زیر انتظام گوانتاناموبے کیوبا میں قید گیارہ ستمبر کے دہشت گرد حملوں کے ماسٹر مائنڈ سمجھے جانے والے خالد شیخ محمد اور دو دیگر مشتبہ ملزمان ولید بن عطاش اور مصطفیٰ الحوساوی اپنا جرم قبول کرنے پر رضامند ہو گئے ہیں ۔ 

نیو یارک ٹائمز کے مطابق معاہدے کے حصے کے طور پر وہ سزائے موت سے بچ سکتے ہیں۔ امریکی محکمہ دفاع کے گوانتانامو بے ، کیوبا میں ملٹری کمیشن کے مطابق تینوں ملزمان نے پری ٹرائل اگریمنٹ یا باقاعدہ مقدمے کی سماعت سے قبل ایک معاہدے کے تحت اعتراف جرم پر رضامندی ظاہر کی ہے ۔

 نائن الیون کے ملزمان پر 19 دہشت گردوں کو تربیت، مالی مدد اور دیگر مدد فراہم کرنے کا الزام ہے ، جنہوں نے مسافر طیاروں کو ہائی جیک کیا اور 11 ستمبر 2001 کو ورلڈ ٹریڈ سنٹر، پینٹاگون اور شینکسویل، پینسلوینیا کے ایک میدان میں گرا کر تباہ کر دیا تھا ۔ 

ان حملوں میں تقریباً 3,000 افراد ہلاک ہوئے تھے۔نائن الیون کیس کے دیگر ملزمان میں علی عبدالعزیز علی اور رمزی بن الشیب شامل ہیں ۔

امریکی میڈیا کے مطابق پانچوں ملزمان پر ابتدائی طور پر5 جون 2008 کو مشترکہ طور پر فرد جرم عائد کی گئی تھی۔