اسرائیلی بربریت کی وجہ سے غزہ بچوں کا قبرستان بن چکا ہے، اہلیہ اردوان کا میلانیا کو خط

ترک خاتونِ اوّل امینہ اردوان نے امریکی خاتونِ اوّل میلانیا ٹرمپ سے غزہ میں اسرائیلی مظالم کا شکار بچوں کے حق میں آواز اٹھانے کی اپیل کی ہے۔

ترک خاتون اول نے میلانیا ٹرمپ کو ایک خط لکھا ہے جس میں غزہ کی صورتحال کو انتہائی دلخراش قرار دیا گیا ہے اور اس علاقے کو بچوں کا قبرستان قرار دیا۔

ترک میڈیا کے مطابق، امینہ اردوان نے اپنے خط میں کہا کہ اسرائیلی کارروائیوں کی وجہ سے غزہ بچوں کا قبرستان بن چکا ہے۔ انہوں نے لکھا، "غزہ کے ہزاروں بچوں کے کفن پر لکھا ہوا 'نامعلوم بچہ' ہمارے ضمیر پر ایک نہ بھرنے والا زخم ہے۔"

انہوں نے اس بات پر زور دیا کہ یہ وقت غزہ میں جاری ناانصافی کے خلاف مشترکہ طور پر آواز اٹھانے اور طاقت کو متحد کرنے کا ہے۔

امینہ اردوان نے میلانیا ٹرمپ کو یاد دلایا کہ انہوں نے یوکرین کے بچوں کے لیے آواز اٹھائی تھی اور اب امید ظاہر کی کہ وہ غزہ کے بچوں کے لیے بھی اسی طرح کی حساسیت کا مظاہرہ کریں گی۔

انہوں نے کہا کہ عالمی رہنماؤں کی حیثیت سے یہ ہماری ذمہ داری ہے کہ ہم مظلوم بچوں کے لیے کھڑے ہوں۔ اس خط کا مقصد دنیا کی توجہ غزہ کے انسانی بحران کی طرف مبذول کرانا اور عالمی رہنماؤں سے اس معاملے میں مداخلت کی درخواست کرنا ہے۔