اسرائیلی کی غزہ میں یورپی اسپتال پر بمباری، مزید 84 فلسطینی شہید

غزہ: اسرائیلی فضائی حملوں میں بدھ کے روز کم از کم 84 فلسطینی شہید ہو گئے، جن میں بچے اور ایک صحافی بھی شامل ہیں۔

طبی ذرائع اور مقامی رہائشیوں کے مطابق، خان یونس کے یورپی غزہ ہسپتال اور شمالی غزہ کے النہدا پناہ گزین کیمپ پر ہونے والے حملوں میں متعدد خواتین اور بچے بھی جاں بحق ہوئے۔  

خان یونس کے یورپی غزہ ہسپتال پر اسرائیلی میزائلوں کے حملے میں متعدد افراد شہید ہوئے۔ اہلکاروں اور انسانی اداروں کے مطابق، ہسپتال کے احاطے اور اس کے اردگرد نو میزائل داغے گئے۔

عینی شاہدین کا کہنا ہے کہ جب شہری اور طبی عملہ زخمیوں کی مدد کے لیے پہنچے تو دوسرے راؤنڈ میں مزید میزائل داغے گئے۔  

الجزیرہ کے ذرائع کے مطابق، اس حملے میں ایک صحافی بھی شہید ہوا۔ اسرائیلی فوج نے دعویٰ کیا کہ اس نے ہسپتال کے نیچے بنے حماس کے کمانڈ سنٹر کو نشانہ بنایا تھا، لیکن اس کے ثبوت میں کوئی شواہد پیش نہیں کیے۔

اس واقعے پر بین الاقوامی مبصرین اور انسانی حقوق کی تنظیموں نے سخت تنقید کی ہے، جنہوں نے طبی سہولیات اور شہریوں پر حملوں کے خدشات کو دہرایا ہے۔  

شمالی غزہ کے النہدا پناہ گزین کیمپ میں مقامی رہائشی محمد الدرینی نے بتایا کہ بے گھر خاندانوں کے خیمے پر بمباری کی گئی، جس میں متعدد افراد شہید ہوئے۔ انہوں نے کہا کہ "اس حملے میں کئی شہید اور زخمی ہوئے، جن میں فٹبال کھیل رہے بچے بھی شامل تھے۔"  

غزہ میں جاری شدید جنگ اور انسانی بحران کے درمیان طبی نظام مکمل طور پر چوپٹ ہو چکا ہے، جبکہ بنیادی وسائل کی شدید قلت ہے۔ الجزیرہ نے رپورٹ کیا کہ زخمیوں کو نکالنے اور ان تک طبی امداد پہنچانے کی کوششیں مسلسل گولہ باری کی وجہ سے متاثر ہو رہی ہیں۔

ریسکیو ورکرز کو بھی زندہ بچ جانے والوں کی مدد کے دوران براہ راست نشانہ بنایا جا رہا ہے۔ اسرائیلی فوجی کارروائیوں میں گزشتہ کئی ہفتوں سے غزہ پر مسلسل بمباری جاری ہے، جس کے نتیجے میں ہزاروں فلسطینی شہید ہو چکے ہیں۔

عالمی برادری کی طرف سے فوری جنگ بندی اور انسانی امداد کی فراہمی کے مطالبے کے باوجود صورتحال دن بدن سنگین ہوتی جا رہی ہے۔