ٹرمپ نے بھارتیوں کے خواب چکنا چور کردیے، بچہ پیدا کرنے پر پابندی

امریکا نے بھارت سے سیاحتی ویزے کے لیے درخواست دینے والوں کو سخت تنبیہ جاری کرتے ہوئے واضح کیا ہے کہ اگر کسی مسافر کا مقصد امریکا پہنچ کر اپنے بچے کی پیدائش کروانا ہو تاکہ نومولود کو امریکی شہریت مل سکے، تو اس کی ویزا درخواست فوراً مسترد کر دی جائے گی۔

بین الاقوامی میڈیا رپورٹس کے مطابق امریکی سفارتخانے نے بھارتی شہریوں کے نام ایک بیان میں کہا ہے کہ ’’سیاحتی ویزے کو غلط طریقے سے استعمال کرنے‘‘ والوں کے خلاف کارروائی مزید سخت کر دی گئی ہے۔

بیان میں یہ بھی کہا گیا ہے کہ اگر قونصلر افسر کو شواہد، معلومات یا اندازے سے یہ محسوس ہو کہ درخواست گزار کا اصل مقصد ’برتھ ٹورزم‘ ہے، تو اس کے لیے ویزا کے حصول کا کوئی امکان نہیں رہے گا۔

امریکی حکام نے بتایا کہ درخواست گزاروں کی آن لائن اور سوشل میڈیا سرگرمیوں کی چھان بین مزید سخت کر دی گئی ہے۔ یہ جانچ پڑتال نہ صرف B-1/B-2 سیاحتی ویزہ لینے والوں کے لیے ہوگی بلکہ H-1B ویزا ہولڈرز اور ان کے H-4 ڈیپنڈنٹس پر بھی لاگو ہو گی۔

یہ اعلان اس وقت سامنے آیا ہے جب بھارت میں بڑی تعداد میں ویزا اپائنٹمنٹس کو اچانک ری شیڈول کیے جانے پر عوام میں بے چینی پیدا ہوئی ہے۔

یاد رہے کہ سابق امریکی صدر ڈونلڈ ٹرمپ نے اپنی دوسری مدتِ صدارت کے آغاز پر پیدائش کی بنیاد پر شہریت دینے کے قانون کو ختم کرنے کا اعلان کیا تھا، تاہم عدالتوں نے اس فیصلے کو روک دیا تھا، اور معاملہ اب بھی قانونی مراحل میں ہے۔