حیدرآباد میں پٹاخے کی فیکٹری میں دھماکا، ہلاکتیں

سندھ کے دوسرے بڑے شہر حیدرآباد کے علاقے لیاری گوٹھ میں دریائے سندھ کے کنارے قائم ایک پٹاخہ فیکٹری میں زوردار دھماکہ ہوا جس کے نتیجے میں 5 افراد ہلاک اور 6 شدید زخمی ہو گئے۔

ریسکیو ذرائع کے مطابق دھماکے کے فوراً بعد فیکٹری میں آگ بھڑک اٹھی اور امدادی آپریشن جاری ہے۔ دھماکے کی آواز دور دور تک سنی گئی اور علاقے میں خوف و ہراس پھیل گیا۔

ریسکیو حکام کا کہنا ہے کہ فیکٹری رہائشی علاقے سے باہر زرعی کھیتوں کے قریب واقع تھی۔ دھماکے اور آگ سے فیکٹری کا کچھ حصہ گر گیا اور کئی افراد ملبے تلے دبے ہوئے ہیں۔

مقامی لوگوں کی بڑی تعداد امدادی کاموں میں شامل ہو گئی۔ حکام نے خدشہ ظاہر کیا ہے کہ ہلاکتوں میں اضافہ ہو سکتا ہے۔