شاہد اسلم پاکستانی کرکٹ ٹیم کے بیٹنگ کوچ مقرر

لاہور: قومی کرکٹ ٹیم میں بیٹنگ کے مسائل کو دیکھتے ہوئے پی سی بی نے شاہد اسلم کو قومی کرکٹ ٹیم کا نیا بیٹنگ کوچ مقرر کردیا۔

پاکستان کرکٹ بورڈ کی جانب سے مستقل بیٹنگ کوچ کی تقرری کی جارہی ہے اور اس حوالے سے پی سی بی نے شاہد اسلم کوپاکستان کرکٹ ٹیم کا نیا بیٹنگ کوچ مقرر کیا ہے، بورڈ کی جانب سے اس کی تصدیق کردی گئی ہے۔  

پاکستان کرکٹ بورڈ کے مطابق شاہد اسلم بیٹنگ کوچ کی حیثیت سے زمبابوے اور جنوبی افریقا روانہ ہورہے ہیں، قومی ٹیم کے لیے اسپن بولنگ کوچ کی تلاش ہے جس کا تقرر جلد کردیا جائے گا۔

ذرائع کا کہنا ہے کہ شاہد اسلم کو عاقب جاوید کی سفارش پر کوچ مقرر کیا گیا ہے، وہ ماضی میں کئی سال تک ٹیم کے سپورٹ اسٹاف میں شامل تھے ، وہ بیٹرز کو  پریکٹس کرانے میں شہرت رکھتے ہیں اور گھنٹوں تھرو ڈان کرانے کی وجہ سے مشہور ہیں۔