عائزہ خان بالی ووڈ میں انٹری کیلیے تیار!

پاکستانی ڈراما انڈسٹری کی مقبول اداکارہ عائزہ خان نے ایک پوسٹ کے ذریعے بالی ووڈ میں کام کرنے کا اشارہ دے دیا۔

تفصیلات کے مطابق عائزہ خان نے اپنی انسٹاگرام اسٹوری میں ہوائی جہاز میں سفر کرتے ہوئے ایک تصویر شیئر کی، جس کے کیپشن میں انہوں نے "What’s Next" (آگے کیا؟) لکھا۔

اس کے ساتھ ہی انہوں نے پاکستان اور بھارت کے جھنڈوں کے درمیان ہاتھ ملانے والے ایموجی کا استعمال کیا، جس نے مداحوں میں قیاس آرائیوں کو ہوا دی۔  

ایک اور اسٹوری میں عائزہ خان کا سائڈ پوز دکھائی دیا، جس میں "ڈے ٹو" کے الفاظ لکھے ہوئے تھے، جو اس بات کی طرف اشارہ کرتے ہیں کہ وہ کسی نئے مقام پر اپنا دوسرا دن گزار رہی ہیں۔

اگرچہ عائزہ خان نے اس حوالے سے کوئی تفصیلات شیئر نہیں کیں، لیکن مداحوں اور مبصرین کے درمیان یہ قیاس آرائیاں زور پکڑ رہی ہیں کہ وہ کسی بھارتی برانڈ کی تشہیر یا کسی پراجیکٹ کا حصہ بن سکتی ہیں۔  

یاد رہے کہ عائزہ خان کو ماضی میں بھی کئی بھارتی فلموں کی پیشکش ہو چکی ہے، لیکن انہوں نے واضح کیا تھا کہ ان کا فلموں میں کام کرنے کا کوئی ارادہ نہیں ہے۔

تاہم، ان کی حالیہ اسٹوریز نے اس امکان کو دوبارہ زندہ کر دیا ہے کہ وہ بھارتی انڈسٹری کے ساتھ کسی طرح کے تعاون پر غور کر رہی ہوں۔  

عائزہ خان کی جانب سے کسی بھارتی پراجیکٹ یا برانڈ کے ساتھ منسلک ہونے کی خبر ان کی کامیابیوں میں ایک اور سنگ میل ثابت ہو سکتی ہے۔

تاہم، اس حوالے سے ابھی تک کوئی سرکاری تصدیق نہیں ہوئی ہے، اور مداحوں کو مزید تفصیلات کا انتظار ہے۔