عائزہ خان اور دانش تیمور بچوں کی بڑھتی عمر کیوجہ سے پریشان، مداحوں سے اپیل کردی

شوبز انڈسٹری کے مشہور جوڑے عائزہ خان اور دانش تیمور نے اپنے مداحوں اور فالوورز سے پرزور اپیل کی ہے کہ وہ ان کے بچوں رایان اور حورین کی پرائیویسی کا احترام کریں۔  

عائزہ خان نے اپنے انسٹاگرام اکاؤنٹ پر جذباتی پوسٹ شیئر کرتے ہوئے مداحوں کا شکریہ ادا کیا کہ انہوں نے ہمیشہ ان کا ساتھ دیا۔ تاہم، انہوں نے واضح کیا کہ جیسے جیسے ان کے بچے بڑے ہو رہے ہیں، والدین کی حیثیت سے ان کی ذمہ داری ہے کہ وہ انہیں زیادہ بچائیں۔  

عائزہ نے لکھا کہ "ہمارے بچے بڑے ہو رہے ہیں اور ان کی اپنی منفرد زندگیاں ہیں، والدین ہونے کے ناطے، اب ہماری ذمہ داری ہے کہ ہم ان کی پرائیویسی کو محفوظ رکھیں تاکہ وہ پبلک دباؤ کے بغیر زندگی کو آزادی سے جی سکیں‘۔

انہوں نے لکھا کہ ’جب تک وہ 18 سال کے نہیں ہوجاتے اور خود فیصلہ نہیں کرتے کہ وہ سوشل میڈیا کا حصہ بننا چاہتے ہیں، ہم نے ان کی زندگیوں کو پرائیویٹ رکھنے کا فیصلہ کیا ہے۔‘

اس کے ساتھ ہی جوڑے نے اپنے بچوں کے نام سے چلنے والے تمام فین پیجز کو بھی درخواست کی کہ وہ انہیں ڈی ایکٹیویٹ کر دیں تاکہ ان کی پرائیویسی کا احترام کیا جا سکے۔  

یہ اپیل اس وقت سامنے آئی ہے جب کل ہی عائزہ خان نے حورین کے پہلے روزے کی خوشی میں خاندانی تصاویر شیئر کی تھیں۔  

ان کے اس پیغام نے سوشل میڈیا پر بچوں کی پرائیویسی کے حوالے سے ایک اہم بحث چھیڑ دی ہے، جس میں سیلیبریٹیز کے والدین کو پیش آنے والے چیلنجز پر روشنی ڈالی گئی ہے۔