فواد خان نے ماہرہ کے ساتھ دوبارہ کام نہ کرنے کی وجہ بتادی
Webdesk
|
11 Jan 2024
عالمی شہرت یافتہ پاکستانی اداکار فواد خان نے اداکارہ ماہرہ خان کے ساتھ دوبارہ کام نہ کرنے کی وجہ بتا دی۔
واضح رہے کہ فواد خان اور ماہرہ خان نے ہم سفر ڈرامے میں ایک ساتھ کام کیا جس کے بعد دونوں نے شہرت کی بلندیوں کو چھوا اور دونوں ہی اداکاروں کی جوڑی کو برصغیر میں شائقین نے پسند کیا تھا۔
اس کے بعد سے اب تک کئی سال گزرنے کے باوجود یہ جوڑی دوبارہ اُس طرح سے کام کرتی کسی سیریل یا فلم میں ایک ساتھ نظر نہیں آئی جبکہ مداح جوڑے کو دوبارہ ایک ساتھ دیکھنے کے بہت زیادہ خواہش مند ہیں۔
فواد خان نے حال ہی میں ایک انٹرویو میں ماہرہ خان کے ساتھ دوبارہ کام نہ کرنے کی وجہ بیان کرتے ہوئے کہا کہ ’دو فنکار جب ایک ساتھ زیادہ کام کریں تو پھر اُن کی جوڑی معمولی ہوجاتی یا پھر ڈیمانڈ کم ہوجاتی ہے‘۔
انہوں نے کہا کہ ’ماہرہ خان کے ساتھ کام کے بعد سے ہمارے درمیان عزت کا گہر رشتہ قائم ہے اور اگر اب ہمیں دوبارہ کسی پلے میں ایک ساتھ موقع ملا تو دونوں ایک دوسرے سے محتاط رہیں گے جس کی وجہ سے شاید کام پر بھی اثر پڑے‘۔
فواد خان نے اپنی بات کو جاری رکھتے ہوئے کہا کہ، ’جب آپ کسی ایسے انسان کے ساتھ زیادہ کام کرتے ہیں جس کے ساتھ آپ کا عزت کا مضبوط رشتہ قائم ہو تو پھر آپ کے تعلقات پیچیدہ ہوجاتے ہیں اور مجھے لگتا ہے کہ ہمیں کام کی وجہ سے رشتوں کو خراب نہیں کرنا چاہیے، اسی وجہ سے میں ماہرہ خان کے ساتھ زیادہ کام نہیں کیا کیونکہ ہم عزت کا رشتہ خراب نہیں کرنا چاہتے اور میں یہ بھی نہیں چاہتا کہ ہم دونوں یہ سوچیں کہ ہم ایک دوسرے کا استعمال کررہے ہیں‘۔
پاکستانی اداکار نے اپنی ساتھی کی محنت کا اعتراف کرتے ہوئے کہا کہ ’ماہرہ خان انتھک محنت کرتی ہیں اور میں نے ماہرہ خان کا جذبہ کام کے دوران دیکھا ہے اور مانتا ہوں کہ میں اُس قدر جنونی نہیں ہوں‘۔
Comments
0 comment