مکیش امبانی کے بیٹے کی شادی میں تینوں خانز کی سرپرائز پرفارمنس

بھارت کے بزنس ٹائیکون مکیش امبانی کے بیٹے اننت امبانی کی شادی کی تقریب میں پہلی بار بالی ووڈ کے تینوں خانز نے ایک ساتھ ڈانس کر کے مداحوں اور شرکا کو سرپرائز دیا۔

بھارتی ریاست گجرات کے شہر جام نگر میں اننت امبانی کی شادی کی تقاریب یکم سے تین مارچ تک منعقد کی گئیں جس میں بالی ووڈ کی معروف شخصیات سمیت دنیا بھر کے نامور ستاروں، ٹیک جائنٹس، سیاست دان اور کھلاڑیوں نے بھی شرکت کی۔

اس تقریب کی سرپرائز انٹری تو ایک سے بڑھ کر ایک تھی مگر سب سے زیادہ خوشگوار اور حیران کن مرحلہ وہ تھا جبکہ تینوں خانز شاہ رخ، عامر اور سلمان اسٹیج پر آئے اور گانے پر رقص کیا۔

تینوں خانز کو ایک ساتھ ڈانس کرتا دیکھ کر مداح نہ صرف حیران ہوئے بلکہ انہیں ایک ساتھ کام کرنے کا مشورہ دیا اور یہ بھی کہا کہ ابھی تینوں کے زوال کا کوئی چانس نہیں ہے۔

کچھ مداحوں نے شاہ رخ خان کے اُس انٹرویو کا حوالہ بھی دیا جس میں کنگ خان نے کہا تھا کہ ابھی کسی پروڈیوسر کے پاس اتنے پیسے نہیں کہ وہ تینوں خانز کو ایک ساتھ برداشت کرسکے۔

صارفین نے اس پرفارمنس کو شاہکار قرار دیتے ہوئے کہا کہ یہ سب مکیش امبانی ہی کرسکتا تھا۔