نازش جہانگیر کو عدالت سے بڑا ریلیف مل گیا

اداکارہ نازش جہانگیر کو عدالتی ریلیف ملا، کیونکہ کینٹ کچہری لاہور نے ان کے خلاف جاری ورانٹ گرفتاری منسوخ کر دیے۔

عدالت نے 50 ہزار روپے کے مچلکوں کے عوض یہ فیصلہ سنایا۔ نازش جہانگیر اپنے وکیل بیرسٹر حارث کے ہمراہ عدالت میں پیش ہوئیں، جہاں جوڈیشل مجسٹریٹ غلام شبیر سیال نے کیس کی سماعت کی۔

یہ کیس اداکار ہارون اسود نے نازش جہانگیر کے خلاف دائر کیا تھا، جس میں ان پر امانت میں خیانت، فراڈ، اور دھمکیوں کے الزامات عائد کیے گئے تھے۔

استغاثہ کا کہنا تھا کہ نازش جہانگیر نے 25 لاکھ روپے اور ایک گاڑی واپس نہیں کی۔ گزشتہ سماعت میں نازش جہانگیر کی عدم پیشی پر ان کے خلاف ناقابل ضمانت وارنٹ گرفتاری جاری کیے گئے تھے، لیکن آج عدالت میں پیشی کے بعد ان وارنٹس کو منسوخ کر دیا گیا۔

کیس کی مزید سماعت 28 اپریل تک کے لیے ملتوی کر دی گئی ہے۔ نازش جہانگیر کے وکیل نے عدالت میں تمام قانونی دفعات پر زور دیا، جس کے بعد یہ فیصلہ سامنے آیا۔