کورونا کے نئے ویریئنٹ کا پھیلاؤ، اپنی حفاظت کیسے کریں؟

کورونا کے نئے ویریئنٹ کے کیسز میں اضافے کے پیش نظر محکمہ صحت سندھ نے ہدایت نامہ جاری کردیا۔ 

اس حوالے سے کراچی سے ڈائریکٹر جنرل ہیلتھ سندھ کی جانب سے جاری ہدایت نامہ میں سندھ کے تمام ڈی ایچ اوز اور میڈیکل سپرنٹینڈنٹس کو اقدامات کی ہدایت کی گئی ہے۔ 

ہدایت نامہ میں کہا گیا ہے کہ کورونا کے متاثرین کے ساتھ منسلک افراد کی نشاندہی کر کے قرنطینہ کیا جائے، جبکہ مریضوں سے منسلک افراد ٹیسٹ کرائیں اور سیلف آئسولیشن اختیار کریں۔ 

ڈی جی ہیلتھ سندھ نے کہا کہ تمام ڈی ایچ کیوز اور ٹی ایچ کیوز میں کورونا وارڈ قائم کئے جائیں۔ شدید علامات والے افراد کو مناسب علاج معالجے کی سہولت فراہم کی جائے۔

تمام اسپتالوں میں بیڈز و طبی سہولیات اور وسائل کو یقینی بنایا جائے۔ بالخصوص متاثرہ علاقوں میں ویکسینیشن کا عمل تیز کیا جائے، مزید کہا گیا کہ کوویڈ 19 سے متعلق جھوٹی خبروں کے بجائے قابل بھروسہ ذرائع استعمال کئے جائیں۔ 

ہدایت نامہ کے مطابق نئے کیسوں کی تشخیص کو مضبوط سرویلنس سسٹم کے تحت مانیٹر کیا جائے۔ عوام احتیاطی تدابیر اختیار کرتے ہوئے فیس ماسک استعمال کریں۔ 

ڈی جی ہیلتھ نے مزید کہا کہ علامات والے افراد سے ملتے وقت فاصلہ رکھیں اور ہاتھ اچھی طرح دھوئیں۔