کراچی میں ڈکیتوں نے معروف پاکستانی اداکارہ کو لوٹ لیا

شہر قائد کے علاقے کورنگی میں پاکستانی مشہور ڈرامہ انڈسٹری کی اداکارہ کے ساتھ چوری کی واردات ہوئی جسے پولیس نے ناکام بنادیا۔

تفصیلات کے مطابق کورنگی ماڈل کالونی کی پولیس نے پاکستانی مشہور ڈرامہ بی باجی میں گلشن آرا کا کردار ادا کرنے والی جویریہ نٸیر کے ساتھ واردات کی کوشش ناکام بنادی۔

ایس ایس پی کورنگی حسن سردار نے بتایا کہ تھانہ ماڈل کالونی پولیس اور ڈاکوٶں میں دو طرفہ فاٸرنگ کا تبادلہ پیش آیا، کورنگی ماڈل کالونی پولیس کی جوابی فاٸرنگ سے ایک ڈاکو کو زخمی حالت میں گرفتار کرلیا، جس کی شناخت شہزاد کے نام سے ہوئی جبکہ اُس کا دوسرا ساتھی فرار ہوگیا۔

پولیس کے مطابق ڈاکو کے قبضے سے خاتون سے چھینی گئی نقدی، موبائل فون اور قیمتی سامان برآمد کرلیا گیا ہے۔اس کے علاوہ اُس کے پاس سے اسلحہ اور موٹرسائیکل بھی برآمد ہوئی۔

ایس ایس پی کے مطابق ڈکیتوں نے اداکارہ سے موبائل فون اور سونے کی چار چوڑیوں سمیت نقدی چھینی تھی، جسے برآمد کر کے اُن کے حوالے کردیا گیا ہے۔

حسن سردار نے بتایا کہ مقابلے میں زخمی اور حراست میں لیے گئے ڈکیت کو طبی امداد کے لیے اسپتال منتقل کردیا گیا جبکہ دوسرے ملزم کی تلاش جاری ہے۔