مکھیوں والی مثال، مشی خان عدنان صدیقی پر برس پڑیں

سینئر اداکار عدنان صدیقی کے مکھیوں اور خواتین سے متعلق دیے گئے حالیہ بیان کے بعد ماضی کی معروف پاکستانی اداکارہ مشی خان نے اُن پر سخت تنقید کی ہے۔

اپنے آفیشل انسٹاگرام ہینڈل پر مشی خان نے اپنا ویڈیو پیغام جاری کیا جس میں اداکارہ کا کہنا تھا کہ عدنان صدیقی کو پرائیڈ آف پرفارمنس ایوارڈ سے نوازا گیا تھا جس پر مجھے بہت خوشی ہوئی تھی لیکن اُنہوں نے حال ہی میں ایک شو کے دوران ایسی بات کردی جسے سُن کر مجھے حیرانگی ہوئی۔

مشی خان نے کہا کہ اتنا بڑا ایوارڈ ملنے کے بعد عدنان صدیقی کو کیا ہوگیا ہے، یہ ایوارڈ حاصل کرنے کے بعد انسان کا مذاق بھی شاندار ہونا چاہیے لیکن اگر آپ ایسا مذاق نہیں کرسکتے تو آپ کو نچلی سطح کا مذاق کرنے کے بجائے نارمل بات کرنی چاہیے۔

مشی خان کا کہنا تھا کہ دورانِ شو میزبان ندا یاسر نے تو عدنان صدیقی کی مثال پر لاتعلقی کا اظہار کردیا تھا لیکن اگر یہ مثال میرے شو میں دی گئی ہوتی تو میں شہد کی مکھی بن کر عدنان صدیقی پر ایسے بیٹھتی کہ منہ پر سوجن ہوجاتی اور پھر وہ سوجن دوائی سے ہی ختم ہوتی۔

یاد رہے کہ حال ہی میں عدنان صدیقی نے حال ہی میں ایک شو میں بات کرتے ہوئے کہا تھا کہ خواتین اور مکھیوں کی مثال ایک جیسی ہے، آپ جتنا خواتین کے پیچھے بھاگیں گے وہ آپ سے اُتنا ہی دور بھاگیں گی اور جب انسان ہاتھ پر ہاتھ رکھ کر خاموشی سے بیٹھ جاتا ہے تو خواتین مکھی کی طرح ہاتھ پر آکر بیٹھ جاتی ہیں۔