فیکٹ چیک، کیا پی ٹی آئی 7 دسمبر کو دوبارہ اسلام آباد میں احتجاج کرنے جارہی ہے؟

انٹرنیٹ پر پاکستان تحریک انصاف کے رہنما اور سابق اسیپکر قومی اسمبلی اسد قیصر کے بیان کو منسوب کر کے دعویٰ کیا جارہا تھا کہ پی ٹی آئی 7 دسمبر کو دوبارہ اسلام آباد میں بھرپور تیاری کے ساتھ احتجاج کرنے جارہی ہے۔

معاملہ کیسے شروع ہوا؟

پاکستان تحریک انصاف خیبرپختونخوا کی پارلیمانی پارٹی کے گزشتہ روز اجلاس میں اراکین نے اسلام آباد میں دوبارہ احتجاج کا عندیہ دیا تاہم کسی حتمی تاریخ کا اعلان نہیں کیا تھا۔

سوشل میڈیا پر اسد قیصر کے حوالے سے بیان وائرل ہوا جس میں دعویٰ کیا جارہا تھا کہ پی ٹی آئی 7 دسمبر کو دوبارہ اسلام آباد میں احتجاج کرنے کا ارادہ رکھتی ہے۔

حقیقت کیا ہے؟

پی ٹی آئی نے اس خبر کی تردید کی جبکہ مرکزی ترجمان نے کہا کہ 7 دسمبر کو دوبارہ اسلام آباد احتجاج کے حوالے سے سامنے آنے والی خبر درست نہیں ہے۔

انہوں نے کہا کہ کچھ دنوں سے جعلی خبروں کا بازار گرم ہے، پہلے دعویٰ کیا گیا کہ پارٹی کا نیا چیئرمین بنادیا گیا پھر سلمان اکرم راجہ کے حوالے سے خبر آئی جبکہ وہ اپنے عہدے پر کام کررہے ہیں۔

انہوں نے کہا کہ 7 دسمبر کو اسلام آباد دوبارہ احتجاج کے لیے آنے کی خبر درست نہیں، اسد قیصر نے 7 دسمبر کو دوبارہ اسلام آباد جانے کے حوالے سے کوئی بیان نہیں دیا اور نہ ہی ایسا کوئی فیصلہ پارٹی کی سطح پر ہوا ہے۔