26 نومبر احتجاج میں اموات ہوئیں، ایچ آر سی پی کی تہلکہ خیز رپورٹ

پاکستان کمیشن برائے انسانی حقوق (ایچ آر سی پی) نے 26 نومبر 2024 کو اسلام آباد میں پاکستان تحریک انصاف (پی ٹی آئی) کے احتجاج سے متعلق اپنی فیکٹ فائنڈنگ رپورٹ جاری کر دی۔

ایچ آر سی پی کی رپورٹ میں وفاقی حکومت کے اس دعوے کو مسترد کیا گیا ہے کہ احتجاج کے دوران کوئی جانی نقصان نہیں ہوا تھا جبکہ احتجاج کے دوران مظاہرین اور سیکیورٹی اہلکاروں دونوں کی ہلاکتیں ہوئیں۔

ایچ آر سی پی کی فیکٹ فائنڈنگ رپورٹ میں بتایا گیا ہے کہ ایک اعلیٰ سطحی فیکٹ فائنڈنگ مشن نے اس واقعے کے مختلف پہلوؤں کا جائزہ لیا۔

رپورٹ میں کہا گیا ہے کہ ٹیم نے ریاستی نمائندوں، پی ٹی آئی قیادت، موقع پر موجود صحافیوں، اور احتجاج کے دوران مبینہ طور پر ہلاک ہونے والے سات افراد کے اہل خانہ کے بیانات قلمبند کیے۔

ایچ آر سی پی کے مطابق مشن کو ان الزامات پر تشویش ہے کہ ہسپتال انتظامیہ اور پولیس نے متاثرین کی لاشوں کو اُس وقت تک اپنی تحویل میں رکھا، جب تک اہل خانہ نے کسی قسم کی قانونی کارروائی نہ کرنے کی یقین دہانی نہ کروائی۔ تاہم، اسپتال انتظامیہ نے فیکٹ فائنڈنگ ٹیم سے بات کرنے سے انکار کر دیا۔ صحافیوں اور متاثرہ خاندانوں کے بیانات کے مطابق، ہسپتال معلومات چھپا رہے ہیں۔

رپورٹ میں کہا گیا ہے کہ آئین کے تحت پرامن اجتماع کا حق دیا گیا ہے لیکن یہ حق قانون کے دائرے میں رہ کر استعمال کیا جانا چاہیے۔

رپورٹ کے مطابق کچھ مظاہرین کے پاس غلیلیں، آنسو گیس کے گولے اور آتشیں اسلحہ موجود تھا، جبکہ انتظامیہ نے احتجاج سے نمٹنے کے لیے غیر ضروری طاقت کا استعمال کیا۔ مشن نے مظاہرین پر آتشیں اسلحے کے استعمال سے متعلق معلومات کے لیے وزیر داخلہ سے رابطہ کرنے کی کوشش کی، لیکن وہ ٹیم سے ملاقات کے لیے دستیاب نہیں تھے۔

ایچ آر سی پی نے احتجاج کے دوران میڈیا کی خاموشی پر بھی شدید تشویش کا اظہار کیا اور کہا ہے کہ ریاستی جبر یا خود ساختہ سنسرشپ کی وجہ سے میڈیا اس واقعے پر رپورٹنگ کرنے سے باز رہا۔ مشن کے مطابق، میڈیا کو آزادانہ طور پر حقائق رپورٹ کرنے کا موقع فراہم کیا جانا چاہیے تھا۔

ایچ آر سی پی نے حکومت سے مطالبہ کیا ہے کہ واقعے کی فوری طور پر آزادانہ اور غیرجانبدارانہ تحقیقات کی جائیں۔

رپورٹ میں  مزید یہ بھی کہا گیا ہے کہ متاثرہ خاندانوں، پی ٹی آئی، اور دیگر سیاسی فریقین کو اس تحقیقاتی عمل میں شامل کیا جائے تاکہ حقائق کو منظر عام پر لایا جا سکے۔