عمران خان کا چیف جسٹس اور آئینی بینج کے سربراہ کو 349 صفحات پر مشتمل خط

بانی چیئرمین پی ٹی آئی نے چیف جسٹس یحییٰ آفریدی اور جسٹس امین الدین خان کو خط لکھ دیا جو 349 صفحات پر مشتمل ہے۔

عمران خان نے خط میں انسانی حقوق، الیکشن دھاندلی، 26 نومبر سمیت تمام موضوعات پر مفصل رپورٹس بھی شامل کی ہیں۔

خط میں لکھا گیا ہے کہ 24 سے 27 نومبر کے دوران بیشتر پی ٹی آئی کارکنان کو گرفتار کیا گیا۔ اسپتال کا رکارڈ سیل کرکہ ٹیمپر کیا گی، پی ٹی آئی کارکنان کو زخمی کیا گیا ، جبری طور پر لاپتہ کیا گیا ، ہمارے کئی کارکنان کو جان سے ماردیا گیا۔

عمران خان نے خط میں لکھا کہ الیکشن میں ہونے والی دھاندلی ، پچھلے 18 ماہ سے جاری انسانی حقوق کی خلاف ورزیوں کے خلاف مسلسل عدالت کا دروازہ کھٹکھٹایا، موجودہ حکومت الیکشن فراڈ اور تاریخی دھاندلی کے نتیجے میں وجود میں آئی ہے۔

انہوں نے لکھا کہ اس غیر آئینی حکومت نے پی ٹی آئی کے خلاف ظلم کر پہاڑ ڈھائے ، ہمارے دفاتر توڑے گئے ، رہنماؤں پر وحشیانہ تشدد کیا، 9 مئی کو مجھے اسلام آباد ہائیکورٹ کی حدود سے غیر قانونی طور پر گرفتار کیا گیا، مجھے  گھسیٹتے ہوئے ہائیکورٹ کی حدود سے گرفتار کرکہ گاڑی میں ڈالا گیا جبکہ سپریم کورٹ نے اس گرفتاری کو غیر قانونی قرار دیا۔

خط میں عمران خان نے لکھا کہ گرفتاری کے اس سارے منظر کو ٹی وی اور سوشل میڈیا پر جان بوجھ لوگوں کو اشتعال دلانے کے لیے دکھایا گیا، اس وحشیانہ طریقے سے گرفتار کرنے پر پورے پاکستان میں لوگوں نے پر امن احتجاج کیا جبکہ اس صورتحال سے فائدہ اٹھانے کے لیے مشتعل افراد کو کارکنان کے ہجوم میں شامل کیا گیا۔