بھارت خود کو 10 گنا بڑا ملک کہتا ہے مگر عاصم منیر جیسا فیلڈ مارشل کہاں سے لائے گا؟ صدر زرداری

صدرِ مملکت آصف علی زرداری نے فیلڈ مارشل سید عاصم منیر کی قیادت اور مسلح افواج کی پیشہ ورانہ صلاحیتوں کو خراجِ تحسین پیش کرتے ہوئے کہا ہے کہ پاکستان کا دفاع مضبوط ہاتھوں میں ہے اور دشمن کو منہ توڑ جواب دینے کی پوری صلاحیت رکھتا ہے۔

گڑھی خدا بخش میں محترمہ بے نظیر بھٹو کی برسی کے موقع پر جلسے سے خطاب کرتے ہوئے صدر آصف زرداری نے کہا کہ ہم نے ایسا فوجی سربراہ مقرر کیا جس نے بھارت کو عملی طور پر یہ باور کرا دیا کہ پاکستان اپنے دفاع سے بخوبی آگاہ ہے۔

ان کا کہنا تھا کہ بھارت کے مزید جنگی طیارے بھی گرا سکتے تھے تاہم پاکستان نے ضبط اور تحمل کا مظاہرہ کرتے ہوئے اُن پر رحم کیا۔

صدر مملکت نے کہا کہ “مودی کو اب اندازہ ہو چکا ہے کہ پاکستان کمزور نہیں، اگر کسی نے دوبارہ جنگ مسلط کرنے کی کوشش کی تو ہم مکمل طور پر تیار ہیں۔”

انہوں نے خبردار کیا کہ اگر کسی نے پاکستان کی طرف میلی آنکھ سے دیکھا تو اسے پیپلز پارٹی، اس کے جیالوں اور پوری قوم کا سامنا کرنا پڑے گا۔

آصف زرداری کا کہنا تھا کہ بھارت خود کو بڑی طاقت کہتا ہے مگر چار دن کی جنگ برداشت نہیں کر سکا۔ انہوں نے کہا کہ بھارت وہ حوصلہ اور جرات کہاں سے لائے گا جو پاکستان کی قیادت اور خاص طور پر فیلڈ مارشل کے پاس ہے۔

صدر نے مزید کہا کہ پاکستان لڑائی کا خواہاں نہیں، مگر اپنے دفاع پر کوئی سمجھوتہ نہیں کرے گا، جو بھی ہاتھ ہماری طرف بڑھے گا، اسے مؤثر جواب دیا جائے گا۔

انہوں نے ماضی کی خارجہ پالیسی پر تنقید کرتے ہوئے کہا کہ چند غلط فیصلوں کی وجہ سے پاکستان کے عالمی تعلقات کو نقصان پہنچا، تاہم اب ملک دوبارہ درست سمت میں گامزن ہے۔

صدر آصف زرداری نے اپنے خطاب کے اختتام پر بے نظیر بھٹو کے نعرے “پاکستان کھپے” کو یاد کرتے ہوئے کہا کہ یہی پیغام آج بھی قوم کو متحد رکھے ہوئے ہے۔