بلاول بھٹو کی سیاسی جماعت پر مخالفت، حکومت سے اپوزیشن کو اسپیس دینے کا مطالبہ

پیپلز پارٹی کے چیئرمین بلاول بھٹو زرداری نے کہا ہے کہ سیاسی جماعتوں کو ایک دوسرے کے لیے جگہ پیدا کرنی چاہیے اور یہ حکومت کی ذمہ داری ہے کہ اپوزیشن کو سیاسی عمل میں مناسب اسپیس دے۔

 ان کا کہنا تھا کہ تمام سیاسی قوتوں کو ملک کی بہتری کے لیے سنجیدہ کردار ادا کرنا ہوگا۔

لاہور میں گفتگو کرتے ہوئے بلاول بھٹو نے بالواسطہ طور پر پی ٹی آئی پر تنقید کرتے ہوئے کہا کہ بعض جماعتیں اپنی سیاست کو بہتر بنانے کے بجائے دوسروں کو نیچا دکھانے اور ریاستی نظام کی خلاف ورزی میں مصروف رہتی ہیں۔

 انہوں نے کہا کہ پاکستان کو مشرقی اور مغربی سرحدوں سے سنگین چیلنجز کا سامنا ہے، مگر ایک سیاسی جماعت اپنی ہی فوج کے ساتھ کھڑے ہونے کے بجائے مخالف ملک کے بیانیے کو تقویت دینے کی کوشش کرتی ہے۔

بلاول نے کہا کہ قومی ہیروز پر حملے کرنے کے بجائے سیاسی جماعتوں کو عوامی مسائل اور خدمت پر توجہ دینی چاہیے۔ ان کا مزید کہنا تھا کہ اگر کوئی سیاسی جماعت دہشت گردی کی پشت پناہی کرے گی تو اس صوبے میں گورنر راج کے نفاذ کا امکان پیدا ہوسکتا ہے۔

پیپلز پارٹی چیئرمین نے الزام عائد کیا کہ متعلقہ جماعت فوج اور عوام کے درمیان دوریاں پیدا کرنے کی کوشش کررہی ہے۔

انہوں نے اس مؤقف کو دہرایا کہ وہ کسی بھی سیاسی جماعت پر پابندی کے حق میں نہیں، تاہم سیاسی قوتوں کو ذمہ دارانہ طرزِ عمل اپنانا ہوگا تاکہ ملک کو درپیش چیلنجز کا مل کر مقابلہ کیا جاسکے۔