بنوں میں کارروائی کے دوران 8 خوارج ہلاک، پاک فوج کے میجر سمیت 3 جوان شہید
ویب ڈیسک
|
30 Oct 2024
خیبرپختونخوا کے ضلع بنوں میں سیکیورٹی فورسز نے آپریشن کیا جس کے دوران 8 خوارج ہلاک ہوگئے جبکہ فائرنگ کے شدید تبادلے میں پاک فوج کے میجر سمیت تین فوجی جوان شہید ہوئے۔
پاک فوج کے شعبہ تعلقات عامہ (آئی ایس پی آر) کے مطابق سیکورٹی فورسز نے بنوں کے علاقے بکا خیل میں دہشت گرد گروپ فتنہ خوارج کی موجودگی کی اطلاع پر آپریشن کیا۔
سیکیورٹی فورسز اور دہشت گردوں کے درمیان فائرنگ کا شدید تبادلہ ہوا جس میں خوارج کے 8 افراد ہلاک جبکہ 7 زخمی ہوئے جبکہ پاک فوج کے میجر عاطف خلیل نے جام شہادت نوش کیا۔
ترجمان پاک فوج کے مطابق فائرنگ کے تبادلے میں نائیک آزاد اللہ اور غنضنفر نے جام شہادت نوش کیا۔
آئی ایس پی آر کے مطابق سکیورٹی فورسز نے خوارج کے ٹھکانے کو موثر طریقے سے تلاش کیا۔ آئی ایس پی آر کے مطابق علاقے میں کسی بھی دوسرے خارجی کو ختم کرنے کے لیے سینی ٹائزیشن آپریشن جاری ہے اور سیکیورٹی فورسز دہشت گردی کی لعنت کو ختم کرنے کیلیے پرعزم ہیں۔
ترجمان پاک فوج کا کہنا ہے کہ ہمارے بہادر سپاہیوں کی ایسی قربانیاں ہمارے عزم کو مزید مضبوط کرتی ہیں۔
Comments
0 comment