بشری بی بی کی بیٹی نے والدہ سے ملاقات نہ ہونے پر عدالت سے رجوع کر لیا

راولپنڈی کی اڈیالہ جیل میں قید سابق خاتونِ اوّل بشریٰ بی بی کی بیٹی نے اپنی والدہ سے ملاقات کی اجازت کے لیے لاہور ہائیکورٹ سے رجوع کر لیا ہے۔

تفصیلات کے مطابق مبشرہ خاور مانیکا نے یہ درخواست لاہور ہائیکورٹ بار ایسوسی ایشن کے صدر ملک آصف احمد کے ذریعے دائر کی ہے، جس میں پنجاب حکومت، سپرنٹنڈنٹ اڈیالہ جیل اور دیگر متعلقہ حکام کو فریق بنایا گیا ہے۔

درخواست میں مؤقف اختیار کیا گیا ہے کہ بشریٰ بی بی اس وقت اڈیالہ جیل میں قید ہیں اور وہ ان کی حقیقی بیٹی ہیں۔

 درخواست گزار کا کہنا ہے کہ جیل قوانین کے مطابق انہیں اپنی والدہ سے ملاقات کا حق حاصل ہے۔

درخواست میں یہ بھی نشاندہی کی گئی ہے کہ جیل کے مقررہ شیڈول کے تحت منگل کے روز اہلِ خانہ کی ملاقات کا دن ہوتا ہے، تاہم متعدد کوششوں کے باوجود جیل انتظامیہ نے ملاقات کی اجازت نہیں دی۔

درخواست گزار نے عدالت سے استدعا کی ہے کہ اڈیالہ جیل کے سپرنٹنڈنٹ کو فوری طور پر ملاقات کا انتظام کرنے کا حکم دیا جائے۔ عدالت سے توقع ظاہر کی گئی ہے کہ وہ جیل قوانین کے مطابق حقِ ملاقات کو یقینی بنائے گی۔