فضل الرحمان نے آئینی ترمیم پر حکومت کا ساتھ کیوں دیا؟ جے یو آئی سربراہ نے خاموشی توڑ کر سب بتادیا

جمعیت علما اسلام کے سربراہ مولانا فضل الرحمان نے انکشاف کیا ہے کہ حکومت نے آئینی ترمیم کی منظوری کیلیے 11 ووٹ خرید لئے تھے، اگر ہم ووٹ نہ دیتے تو بہت خطرناک مسودہ منظور ہوتا۔

ڈیرہ اسماعیل خان میں میڈیا سے گفتگو کرتے ہوئے مولانا فضل الرحمان نے ایک بار پھر اس بات کا تذکرہ کیا کہ حکومت کی طرف سے آئینی ترمیم کا جو مسودہ بھیجا گیا وہ بہت خطرناک تھا، اگر وہ منظور ہو جاتا تو بنیادی انسانی حقوق سلب ہوتے۔

انہوں نے کہا کہ آئینی ترمیم کیلئے حکومت نے11 ووٹ خرید لیے تھے جبکہ ہمارے 8 ووٹ تھے، ووٹ نہ دیتے تو ترمیم کا بہت گندا ڈرافٹ آتا،ہم نے اپوزیشن میں رہ کر ترمیم منظور کی اور اپنی پانچ شقیں بھی ڈالیں۔

فضل الرحمان نے بتایا کہ آئینی ترمیم کی منظوری کے بعد سال 2028 تک ملک سے سود کا خاتمہ ہو جائے گا، اس سمیت جے یو آئی نے پانچ شقیں پیش کی تھیں۔