کراچی بورڈ نے جماعت نہم سائنس اور جنرل گروپ کے سالانہ نتائج 2025 کا اعلان کر دیا

ثانوی تعلیمی بورڈ کراچی نے جماعت نہم سائنس اور جنرل گروپ (ریگولر و پرائیویٹ) کے پہلے سالانہ امتحانات 2025 کے نتائج کا اعلان کر دیا ہے۔

چیئرمین بورڈ غلام حسین سوہو نے بتایا کہ نتائج بورڈ کی آفیشل ویب سائٹ www.bsek.edu.pk  پر دستیاب ہیں۔ انہوں نے کہا کہ امتحانی نتائج میں شفافیت کو اولین ترجیح دی جا رہی ہے۔ اس موقع پر انہوں نے تمام کامیاب طلباء و طالبات کو مبارکباد بھی پیش کی۔

تقریب کے دوران ناظم امتحانات ڈاکٹر حمزو خان تگڑ اور رزلٹ کمیٹی کے اراکین بھی موجود تھے۔

تفصیلات کے مطابق سائنس گروپ میں مجموعی طور پر 1,77,660 طلباء و طالبات نے رجسٹریشن کرائی، جن میں سے 1,75,511 امیدوار امتحانات میں شریک ہوئے جبکہ 2,149 امیدوار غیر حاضر رہے۔

تمام پرچوں میں 1,37,350 طلباء و طالبات کامیاب قرار پائے۔ سائنس گروپ میں کامیابی کا مجموعی تناسب 78.26 فیصد رہا۔

دوسری جانب جنرل گروپ ریگولر اور پرائیویٹ کے اعداد و شمار کے مطابق ریگولر امیدواروں کی کل رجسٹریشن 15,954 رہی، جن میں سے 14,984 نے امتحان دیا اور 970 غیر حاضر رہے۔

کامیابی کا تناسب 57.17 فیصد ریکارڈ کیا گیا۔

پرائیویٹ امیدواروں کی تعداد 5,046 تھی، جن میں سے 4,689 شریک اور 357 غیر حاضر رہے۔ پرائیویٹ جنرل گروپ میں کامیابی کا تناسب 48.26 فیصد رہا۔

مجموعی طور پر جنرل گروپ (ریگولر و پرائیویٹ) میں کامیابی کا اوسط تناسب 54.38 فیصد رہا۔

چیئرمین غلام حسین سوہو نے کہا کہ امتحانی عمل میں شفافیت کو یقینی بنایا گیا ہے اور طلبہ کی محنت کے ثمرات کو درست انداز میں سامنے لایا گیا ہے۔