کرم امن معاہدے پر عمل درآمد میں بڑی پیشرفت

خیبرپختونخوا کے ضلع کرم میں امن معاہدے کے تحت فریقین کے مزید چھ بنکرز کو مسمار کر دیا گیا۔

تفصیلات کے مطابق ضلعی انتظامیہ  نے تصدیق کی کہ خار کلی اور بالش خیل میں متحارب فریقین کے تین تین بنکرز کو دھماکہ خیز مواد کے ذریعے تباہ کیا گیا۔

پولیس اور ضلعی انتظامیہ کے مطابق، حالیہ کارروائی کے بعد مجموعی طور پر سولہ بنکرز مسمار کیے جا چکے ہیں، جو کہ مقامی قبائل کے درمیان کشیدگی کے خاتمے اور پائیدار امن کے قیام کے لیے ایک اہم پیش رفت ہے۔

ضلعی انتظامیہ کے مطابق، فریقین کے درمیان طے پانے والے چودہ نکاتی امن معاہدے کے تحت عملی اقدامات جاری ہیں۔ ان اقدامات میں بنکرز کا خاتمہ، اسلحے کی نمائش پر پابندی، اور علاقے میں امن و امان برقرار رکھنے کے لیے مشترکہ کوششیں شامل ہیں۔ یہ کارروائیاں تمام فریقین کی مشاورت سے کی جا رہی ہیں تاکہ علاقے میں دیرپا امن کو یقینی بنایا جا سکے۔

مقامی عمائدین اور امن جرگے بھی اس عمل میں اپنا کردار ادا کر رہے ہیں تاکہ معاہدے کے تمام نکات پر موثر عملدرآمد ممکن بنایا جا سکے۔

ڈپٹی کمشنر کا کہنا ہے کہ امن معاہدے پر مکمل عملدرآمد یقینی بنانے کے لیے مزید عملی اقدامات کیے جائیں گے۔ اس حوالے سے ضلعی حکام نے تمام فریقین پر زور دیا ہے کہ وہ معاہدے کی پاسداری کریں اور کسی بھی قسم کی خلاف ورزی سے گریز کریں، تاکہ علاقے میں مستقل بنیادوں پر امن قائم کیا جا سکے۔

لوئر کرم میں بنکرز کے مسمار کیے جانے کا عمل امن کے قیام کی جانب ایک مثبت قدم ہے۔ ضلعی انتظامیہ، مقامی قبائل، اور جرگوں کی مشترکہ کوششیں علاقے میں دیرپا امن کے قیام میں مددگار ثابت ہو سکتی ہیں۔ اگر فریقین معاہدے پر عمل پیرا رہتے ہیں تو مستقبل میں تنازعات کے مکمل خاتمے اور ترقی کے نئے دور کا آغاز ممکن ہو سکتا ہے۔