کوئٹہ میں درج مقدمے میں خدیجہ شاہ بری، عدالت کا فوری رہائی کا حکم

کوئٹہ کی انسداد دہشت گردی کی عدالت نے پی ٹی آئی کی حامی اور معروف فیشن ڈیزائنر خدیجہ شاہ کی فوری رہائی کا حکم دے دیا۔

کوئٹہ میں انسداد دہشت گردی عدالت میں خدیجہ شاہ کے خلاف کیس کی سماعت ہوئی، جس میں سید اقبال شاہ ایڈووکیٹ نے مقدمے کی پیروی کی۔

پولیس کی جانب سے خدیجہ شاہ کو 14 روزہ جوڈیشل ریمانڈ پورا ہونے پر عدالت میں پیش کیا گیا تھا۔ عدالت نے دلائل مکمل ہونے اور تفتیشی افسر سے استفسار کے بعد خدیجہ شاہ کو رہا کرنے کا حکم دیا۔

واضح رہے کہ دو ہفتے قبل خدیجہ شاہ کو لاہور سے کوئٹہ راہداری ریمانڈ پر منتقل کیا گیا تھا، اُن کے خلاف کوئٹہ میں مقدمہ درج تھا جسے آج جرم ثابت نہ ہونے پر ختم اور اُن کی رہائی کا حکم دیا گیا۔

عدالت میں سماعت کے موقع پر خدیجہ شاہ کے والد اور اہل خانہ بھی موجود تھے، عدالتی حکم کے بعد اب خدیجہ شاہ اہل وعیال کے ہمراہ لاہور روانہ ہوجائیں گی۔

واضح رہے کہ خدیجہ شاہ عام انتخابات میں صوبائی اسمبلی کی نشست پر مریم نواز کے مدمقابل حصہ لے رہی ہیں۔