خیبرپختونخوا میں 24 خوارج ہلاک

پاک فوج کے شعبہ تعلقات عامہ (آئی ایس پی آر) کے مطابق خیبر پختونخوا میں سیکیورٹی فورسز نے دو الگ الگ انٹیلی جنس بیسڈ کارروائیوں کے دوران بھارتی پراکسی تنظیم فتنہ الخوارج سے تعلق رکھنے والے 24 دہشتگردوں کو ہلاک کر دیا ہے۔

آئی ایس پی آر کے بیان کے مطابق یہ کارروائیاں 4 اور 5 فروری کو کی گئیں۔ پہلی کارروائی ضلع اورکزئی میں خفیہ اطلاعات کی بنیاد پر کی گئی، جہاں سیکیورٹی فورسز نے دہشتگردوں کے ٹھکانے کو مؤثر انداز میں نشانہ بنایا۔ شدید فائرنگ کے تبادلے کے بعد 14 دہشتگرد مارے گئے۔

دوسری کارروائی ضلع خیبر میں کی گئی، جہاں ایک اور انٹیلی جنس بیسڈ آپریشن کے دوران مزید 10 دہشتگرد ہلاک کیے گئے۔

آئی ایس پی آر کا کہنا ہے کہ علاقوں میں کلیئرنس اور سرچ آپریشن جاری ہیں تاکہ کسی بھی باقی ماندہ بھارتی حمایت یافتہ دہشتگرد کا خاتمہ کیا جا سکے۔

بیان میں کہا گیا ہے کہ “عزمِ استحکام” کے وژن کے تحت، جس کی منظوری وفاقی ایپکس کمیٹی نے دی ہے، سیکیورٹی فورسز اور قانون نافذ کرنے والے ادارے ملک سے غیر ملکی سرپرستی میں ہونے والی دہشتگردی کے مکمل خاتمے تک اپنی کارروائیاں پوری شدت سے جاری رکھیں گے۔