کینال منصوبے پر احتجاج، مظاہرین نے وزیر داخلہ سندھ کا گھر جلا دیا

نوشہروفیروز: کینال منصوبے کے خلاف احتجاج کے دوران مورو میں مشتعل افراد نے وزیر داخلہ سندھ ضیا الحسن لنجار کے گھر کو نذر آتش کردیا۔

ذرائع کے مطابق مظاہرین نے کئی کنٹینرز بھی نذر آتش کردیے، قومی شاہراہ پر مشتعل مظاہرین نے ایچ ایس او سمیت پولیس اہلکاروں پر تشدد بھی کیا، مظاہرین ٹریلر سے کھاد کی بوریاں بھی لوٹنے لگے، مشتعل مظاہرین کھاد کی بوریاں لوٹ کر موٹر سائیکل پر لے گئے۔

وزیر داخلہ سندھ ضیا الحسن لنجار نے ایس ایس پی نوشہروفیروز سے واقعے کی تفصیلات طلب کرلیں، انہوں نے کہا کہ قانون کی رٹ کو چیلنج کرنے والے عناصر کے خلاف آہنی اقدامات کیے جائیں، ضلعی سطح پر مزید تازہ دم دستوں، پولیس کمک کو حرکت میں لایا جائے۔

ضیا الحسن لنجار نے کہا کہ شہریوں کی املاک کو نقصان پہنچانے والے شرپسندون کو قانون کی گرفت میں لایا جائے۔