لاہور ہائیکورٹ کے ججز کی حسان نیازی کی ملٹری حراست اور ٹرائل کیخلاف درخواست سننے سے معذرت

لاہور ہائی کورٹ نے پی ٹی آئی رہنما حسان نیازی کی ملٹری حراست اور کورٹ مارشل کیخلاف درخواست پر سماعت کرنے سے معذرت کرلی۔

تفصیلات کے مطابق لاہور ہائیکورٹ کے 2 رکنی بینچ نے تحریک انصاف کے رہنما حسان نیازی کی ملٹری حراست اور کورٹ مارشل کے خلاف دائر درخواست پر سماعت سے معذرت کی۔

عدالت نے کیس کی فائل واپس چیف جسٹس کو بھجواتے ہوئے ہدایت دی کہ اسے کسی دوسرے بینچ کے سامنے مقرر کیا جائے۔ 

جسٹس فاروق حیدر کی سربراہی میں دو رکنی بینچ نے کیس کی سماعت کی، جہاں درخواست گزار کے وکیل فیصل چوہدری پیش ہوئے۔

درخواست میں مؤقف اختیار کیا گیا کہ 9 مئی کے واقعات کے بعد گرفتاری کے باوجود حسان نیازی کو کسی سویلین عدالت میں پیش نہیں کیا گیا اور تھانہ سرور روڈ پولیس نے انہیں غیر قانونی طور پر فوجی حکام کے حوالے کردیا۔

درخواست گزار نے مؤقف اپنایا کہ انہیں فوج کی تحویل میں دینے کا کمانڈنگ آفیسر کا 17 اگست 2023 کا نوٹیفکیشن غیر قانونی ہے، لہٰذا اسے کالعدم قرار دیا جائے۔

درخواست میں مزید استدعا کی گئی کہ حسان نیازی کو فوجی عدالت کی کارروائی اور کورٹ مارشل سے بری قرار دے کر یا تو جیل سے رہا کیا جائے یا انسدادِ دہشت گردی عدالت کے سامنے پیش کرنے کا حکم دیا جائے۔