مدارس بل تنازع، جے یو آئی کی کارکنان کو تیار رہنے کی ہدایت

مدارس بل کے تنازع پر جمعیت علما اسلام نے کارکنان کو حکومت کے خلاف تحریک کیلیے تیار رہنے کی ہدایت کردی۔

تفصیلات کے مطابق جمعیت علما اسلام صوبہ پنجاب نے چھبیسویں آئینی ترمیم میں حکومت کی جانب سے وعدہ خلافی پر غم و غصہ کا اظہار کرتے ہوئے کہا کہ اپنی قیادت کے حکم پر احتجاج کرنے کے لیے تیار ہیں، حکومت کو وعدہ خلافی مہنگی پڑے گی۔

انہوں نے کہا کہ جے یو آئی مفاہمتی پالیسی پر یقین رکھتی ہے لیکن حکمران ہمیں مزاحمتی پالیسی کی طرف دھکیل رہے ہیں، جے یو آئی کارکنان احتجاج کے لیے تیار رہیں۔

جے یو آئی پنجاب کے سیکرٹری جنرل حافظ نصیر احمد احرار، صوبائی ترجمان حافظ غضنفر عزیز, مولانا صفی اللہ، مولانا جمال عبدالناصر، نور خان ہانس، مولانا سعید الرحمٰن سرور، مولانا عبدالمجید توحیدی اور اسید خواجہ نے میڈیا سے گفتگو کرتے ہوئے کیا۔

انہوں نے کہا کہ گزشتہ دنوں حکومت نے علماء کرام کو میدان میں لاکر انہیں باہم لڑانے کی پالیسی اختیار کی اس کی مذمت کرتے ہیں اور علماء کرام سے کہنا چاہتے ہیں کہ آپ حکمرانوں کی عالمی قوتوں کے سامنے سرنڈر کی پالیسی کا حصہ نہ بنیں کیونکہ مدارس رجسٹریشن بل کو روکنا دراصل عالمی ایجنڈے کو تقویت پہنچانے کے لئے کیا جارہا ہے صدر مملکت کے اعتراضات سامنے آمنے کے بعد دودھ کا دودھ اور پانی کا پانی ہوگیا ہے۔