مریم نواز نے گندم کے کسانوں کو خوشخبری سنا دی

پنجاب حکومت نے پرائیویٹ سیکٹر کے تعاون سے کاشتکاروں سے گندم 3500 روپے فی من کے نرخ پر خریدنے کا معاہدہ کر لیا ہے۔

وزیراعلیٰ پنجاب مریم نواز شریف کی زیرِ صدارت گندم سے متعلق ایک اہم اجلاس ہوا جس میں محکمہ زراعت نے فصل کی پیداوار اور آئندہ سال کی خریداری کے جامع پلان پر بریفنگ دی۔

اجلاس کو بتایا گیا کہ پنجاب میں گندم کے وافر ذخائر موجود ہیں اور صوبے میں اس وقت کسی قسم کی کمی نہیں ہے۔

وزیراعلیٰ مریم نواز شریف نے کہا کہ کاشتکار ہمارے بھائی ہیں، ہم انہیں کسی صورت اکیلا نہیں چھوڑیں گے۔

انہوں نے مزید کہا کہ پاکستان کی تاریخ میں پہلی بار گندم کے کاشتکاروں کو ایک ہزار مفت ٹریکٹر فراہم کیے گئے جبکہ کسان کارڈ کے ذریعے اربوں روپے کے زرعی مداخل دیے جا رہے ہیں۔

مریم نواز نے بتایا کہ پنجاب میں تمام اقسام کی کھادیں کنٹرول ریٹ پر وافر دستیاب ہیں، جس سے گندم کی پیداوار میں مزید اضافہ متوقع ہے۔