پیکا ایکٹ کی منظوری، جھوٹی خبر پر 3 سال قید ہوگی

صدر مملکت آصف علی زرداری نے الیکٹرانک کرائمز کی روک تھام کے حوالے سے منظور ہونے والے (ترمیمی) بل 2025  (پیکا) کی منظوری دے دی۔

ایوان صدر سے موصولہ اطلاعات کے مطابق صدر مملکت نے پیکا ایکٹ بل کے ساتھ ڈیجیٹل نیشن پاکستان بل 2025ء پر بھی دستخط کردیے، اس کے علاوہ صدر زرداری نے نیشنل کمیشن آن دی اسٹیٹس آف ویمن ( ترمیمی) بل 2025ء کی بھی توثیق کردی۔ 

اس سے قبل صدر مملکت نے صحافیوں کو اعتماد میں لینے تک بل منظور نہ کرنے کا فیصلہ کیا تھا تاہم پھر اچانک انہوں نے دستخط کردیے۔ واضح رہے کہ پیپلزپارٹی نے بھی پیکا ایکٹ کی مخالفت کی ہے اور گورنر پنجاب سمیت دیگر نے صحافیوں کے ساتھ ہمدردی کا اظہار کیا ہے۔

حکومت نے پیکا ایکٹ ترمیمی بل پہلے قومی اسمبلی  اور پھر گزشتہ روز سینیٹ سے بھی منظور کروالیا تھا جس کے بعد بل کو صدر مملکت کے دستخط کے لئے ایوان صدر بھیجا گیا تھا۔