’اس بار چائے مزیدار نہیں بلکہ کڑوی ہوگی‘

پشاور: خیبر پختونخوا کے مشیر اطلاعات بیرسٹر سیف نے بھارت کی جارحانہ پالیسیوں اور یکطرفہ اقدامات پر سخت ردعمل کا اظہار کرتے ہوئے کہا ہے کہ "اس بار چائے فنٹاسٹک نہیں، بلکہ کڑوی اور ناقابل برداشت ہوگی"۔

بیرسٹر سیف نے اپنے بیان میں کہا کہ "بھارت کی جانب سے فالس فلیگ آپریشنز اور کشمیریوں کے خلاف فسطائی اقدامات انتہائی قابل مذمت ہیں"۔

انہوں نے کہا کہ "مودی سرکار اپنے اسکرپٹڈ ڈراموں کے ذریعے معصوم کشمیریوں پر ظلم ڈھانے کی کوشش کر رہی ہے، بھارت اپنی فاشسٹ سوچ کے تحت پورے برصغیر کو آگ میں جھونکنے پر تلا ہوا ہے"۔

انہوں نے واضح کیا کہ "اگر بھارت نے کسی بھی قسم کی جارحیت کی تو پاکستانی قوم دشمن کو اس کی زبان میں جواب دینا جانتی ہے۔ اس بار چائے کڑوی ہوگی اور ہر جارحانہ حرکت کا منہ توڑ جواب دیا جائے گا۔"

خیبر پختونخوا حکومت کے ترجمان نے موجودہ بحرانی صورت حال سے نمٹنے کے لیے قومی اتحاد کو ناگزیر قرار دیتے ہوئے کہا کہ "عمران خان کی رہائی کے بغیر حقیقی قومی یکجہتی ممکن نہیں، صرف عمران خان کی قیادت میں ہی ملک موجودہ بحرانوں سے نکل سکتا ہے"۔

انہوں نے کہا کہ "پاکستان دشمن عناصر کو ہر محاذ پر شکست دینے کی صلاحیت رکھتا ہے"

یہ بیان اس وقت سامنے آیا ہے جب بھارت نے حال ہی میں کشمیر میں تنازعہ پیدا کرنے کی متعدد کوششیں کی ہیں اور خطے میں کشیدگی بڑھانے کی پالیسی پر عمل پیرا ہے۔