شمالی وزیرستان میں غیر ملکیوں کو لے جانے والا ہیلی کاپٹر گر کر تباہ، ہلاکتوں کی تصدیق

خیبرپختونخوا کے ضلع شمالی وزیرستان میں غیر ملکیوں کو لے جانے والا ہیلی کاپٹر تکنیکی خرابی کے باعث گر کر تباہ ہوگیا۔

مصدقہ اطلاعات کے مطابق چارٹر لڈ ایم آئی ہیلی کاپٹر میں 3 روسیوں سمیت 14 افراد سوار تھے جن میں سے 6 جاں بحق جبکہ 8 شدید زخمی ہوئے ہیں۔

ماڑی پیٹرولیم کے مطابق ہیلی کاپٹر شمالی وزیرستان میں پروازکے دوران آئل فیلڈ کے قریب گر کر تباہ ہوا۔

حادثے کے بعد پاک فوج اور دیگر ریسکیو رضاکاروں کی مدد سے تمام زخمیوں کو سی ایم ایچ اسپتال منتقل کردیا گیا ہے۔

ذرائع کے مطابق ہیلی کاپٹر میں اڑان بھرتے ہی تکنیکی فالٹ پیدا ہوا، ایمرجنسی لینڈنگ کرتے ہُوئے ہیلی کاپٹر کا ٹیل روٹر زمین سے ٹکرا گیا، حادثے کی تحقیقات شروع کر دی گئی ہیں۔