اسلام آباد پولیس اہلکار کی موت کا مقدمہ بھی جیل میں قید عمران خان کیخلاف درج

پی ٹی آئی کے ڈی چوک پر احتجاج کے دوران جاں بحق ہونے والے اسلام آباد پولیس کے اہلکار کی موت کا مقدمہ عمران خان اور وزیراعلیٰ سمیت دیگر کے خلاف درج کرلیا گیا۔

تفصٰلات کے مطابق اسلام آباد پولیس کے کانسٹیبل عبد الحمید شاہ کے قتل کا مقدمہ تھانہ نون میں درج کیا گیا جس میں اقدام قتل، اغوا، اور دہشتگردی سمیت 12 دفعات شامل کی گئی ہیں جبکہ بانی پی ٹی آئی، علی امین گنڈاپور، اعظم سواتی، بیرسٹر سیف، عمر ایوب اور عامر مغل کے ساتھ ساتھ 500 نامعلوم افراد کو نامزد کیا گیا ہے۔

ایف آئی آر کے مطابق پی ٹی آئی رہنما عامر مغل نے شرکا کے ساتھ ملکر کانسٹیبل عبد الحمید کو زبردستی پکڑا اور ان پر لاتوں، مکوں، ڈنڈوں اور پتھروں سے تشدد کیا۔ مزید لکھا گیا ہے کہ عامر مغل اور ساتھی پولیس پر فائرنگ کرتے ہوئے عبد الحمید کو اغوا کر کے لے گئے اور انہیں بڈھانہ لنک روڈ پر بے ہوشی اور زخمی حالت میں چھوڑ کر فرار ہو گئے۔

پولیس اہلکار کو زخمی حالت مین پمز اسپتال منتقل کیا گیا مگر وہ دوران علاج جانبر نہ ہوسکے۔