سیکیورٹی فورسز نے فتنہ الخوارج پر زمین تنگ کردی، 7 ہلاک، 5 زخمی حالت میں گرفتار

خیبرپختونخوا کے ضلع کرم میں سیکیورٹی فورسز نے کارروائی کر کے 7 دہشت گردوں کو ہلاک جبکہ پانچ کو زخمی حالت میں گرفتار کرلیا۔

پاک فوج کے شعبہ تعلقات عامہ (آئی ایس پی آر) کے مطابق پندرہ اگست کی رات سیکیورٹی فورسز نے خفیہ اطلاع پر کرم میں موجود فتنہ الخوارج کے دہشت گردوں کے ٹھکانے کو نشانہ بنایا۔

سیکیورٹی فورسز کی کارروائی کے دوران دہشت گردوں نے فائرنگ کی اور تبادلہ میں 7 دہشت گرد مارے گئے جبکہ پانچ کو زخمی حالت میں گرفتار کرلیا گیا۔

آئی ایس پی آر کے مطابق کارروائی کے نتیجے میں دہشت گردوں کے ٹھکانے کو تباہ جبکہ وہاں سے بڑی تعداد میں ہتھیار، گولہ بارود برآمد کیا گیا ہے۔ مارے گئے خوارج شہریوں اور سیکیورٹی فورسز پر حملوں میں ملوث تھے۔