ترک ساحل پر تارکین وطن کی کشتی کو حادثہ، ایک ہی خاندان کے 6 پاکستانی جاں بحق

کوئٹہ سے تعلق رکھنے والے چھ افراد پر مشتمل ایک خاندان ترک ساحل کے قریب کشتی الٹنے کے ایک دلخراش واقعے میں اپنی جان سے ہاتھ دھو بیٹھا۔

کوئٹہ کے علمدار روڈ کے رہائشی سید علی آغا، ان کی اہلیہ طاہرہ بی بی،چار بچے سبحان (14)، سجاد (12)، فاطمہ (10) اور کوثر (5) اس افسوسناک واقعے میں جاں بحق ہوگئے۔

لواحقین کو 20 مارچ کو ترکی سے ایک فون کال کے ذریعے افسوسناک خبر ملی، جس میں اپنے پیاروں کے کھو جانے کی تصدیق ہوئی۔

ترکی میں پاکستانی سفارتخانے سے مدد حاصل کرنے کی کوششوں کے باوجود لاشوں کی وطن واپسی کے عمل میں مشکلات کا سامنا کرنا پڑا، نتیجتاً، انہوں نے حکام کو ترکی میں دفن کرنے پر رضامندی ظاہر کی۔

علی آغا کے بہنوئی نے انکشاف کیا کہ وہ ہزارہ قبیلے کی ٹارگٹ کلنگ اور مالی مشکلات کی وجہ سے شادی کے بعد ایران منتقل ہو گئے تھے۔ کئی سال بعد، علی آغا ترکی چلے گئے، جہاں انہوں نے اپنے خاندان کے لیے بہتر مستقبل تلاش کرنے کی کوشش کی۔ افسوسناک بات یہ ہے کہ مارچ کے وسط میں یونان جانے کے دوران ان کی کشتی ڈوبنے سے ان کی امیدیں ٹوٹ گئیں۔