مکہ مکرمہ میں حج سیزن کے دوران پہلی بار روبوٹک سرجری کی سہولت فراہم

مکہ مکرمہ میں حج سیزن کے دوران کنگ عبداللہ میڈیکل سٹی نے طبی خدمات میں ایک نئی پیش رفت کرتے ہوئے پہلی بار روبوٹک سرجری کی سہولت فراہم کر دی ہے۔

عرب ٹی وی کے مطابق مکہ مکرمہ ہیلتھ کمپلیکس میں روبوٹک سرجری کے دائرہ کار کو وسعت دی گئی ہے جس کے تحت اب سینے کے پیچیدہ آپریشنز سمیت دیگر اہم سرجریاں انجام دی جا رہی ہیں۔

اس جدید سہولت کے ذریعے مختلف اقسام کے ٹیومرز، یورولوجیکل آپریشنز اور اعضا کی پیوند کاری جیسے حساس آپریشنز انجام دیے جا رہے ہیں۔ اسپتال انتظامیہ کے مطابق روبوٹک سرجری میں جدید ترین نظام استعمال کیا جا رہا ہے جس سے نہ صرف آپریشن زیادہ محفوظ ہوتے ہیں بلکہ ان میں درکار وقت بھی روایتی سرجری سے کہیں کم ہوتا ہے۔

روبوٹک سرجری کے دوران تھری ڈی کیمروں کی مدد سے انتہائی باریک بینی سے کام کیا جاتا ہے جس سے نہ صرف زخم کا سائز کم ہوتا ہے بلکہ مریض کی صحت یابی کا عمل بھی تیز ہو جاتا ہے۔

 مثال کے طور پر سینے کی روایتی سرجری میں جہاں 10 سینٹی میٹر تک کا چیرا لگایا جاتا ہے وہیں روبوٹک سرجری میں صرف ایک سینٹی میٹر کے چھوٹے سوراخ سے ہی آپریشن ممکن ہوتا ہے۔اس پیش رفت سے مکہ مکرمہ میں آنے والے زائرین کو کافی فائدہ پہنچے گا۔