ویب سائٹس اور یوٹیوب چینلز بلاک کرنے کے معاملے پر پی ٹی اے کا مؤقف سامنے آگیا

پاکستان ٹیلی کمیونیکیشن اتھارٹی (پی ٹی اے) نے ریاست مخالف ویب سائٹس اور یوٹیوب چینلز بلاک کرنے کے معاملے پر وضاحت جاری کردی۔

پی ٹی اے کی جانب سے جاری وضاح میں اس خبر کی سختی سے تردید کی گئی جس میں دعویٰ کیا گیا تھا کہ پی ٹی اے نے ریاست مخالف مہم کے تناظر میں یوٹیوب چینلز کی بلاکنگ کے لیے کوئی فہرست تیار کی ہے۔

پی ٹی اے نے کہا ہے کہ ریاست مخالف مہم کے تناظر میں یوٹیوب اور ویب سائٹس بلاک کرنے کی کوئی فہرست تیار کی اور نہ ہی وفاقی حکومت کو کوئی رپورٹ ارسال کی ہے۔

اعلامیے میں ترجمان نے واضح کیا کہ پی ٹی اے کا مینڈیٹ صرف غیر قانونی آن لائن مواد کو ہٹانے یا بلاک کرنے تک محدود ہے، جیسا کہ ’’پریوینشن آف الیکٹرانک کرائمز ایکٹ (پیکا) 2016ء‘‘ اور اس سے متعلقہ قواعد و ضوابط میں درج ہے۔

اعلامیے میں ترجمان نے مزید کہا کہ ریاست مخالف یا نفرت انگیز مواد کے حوالے سے قانونی کارروائی، تفتیش اور عدالتی اقدامات متعلقہ قانون نافذ کرنے والے اداروں کی ذمہ داری ہے۔