عمرے کی آڑ میں گداگری، کراچی ایئر پورٹ سے 3 مسافر خواتین گرفتار

کراچی:ایئرپورٹ پر کارروائی کرتے ہوئے ایف آئی اے امیگریشن نے عمرے کی آڑ میں گداگری میں ملوث 3 خواتین مسافروں کو حراست میں لے لیا۔

ترجمان ایف آئی اے کا کہنا ہے کہ مسافر خواتین کی شناخت عروج فاطمہ، مریم نذیر اور جمیلہ بی بی کے نام سے ہوئی جنہوں نے عمرے کی آڑ میں گداگری کی غرض سے سعودی عرب جانے کی کوشش کی۔

مسافر خواتین کو امیگریشن کلیئرنس کے دوران مشکوک پایا گیا۔ گرفتار خواتین کے پاس واپسی کی ٹکٹ اور ہوٹل بکنگ موجود نہ تھی جبکہ گرفتار خواتین کے پاس عمرہ کی ادائیگی کے لیے درکار ضروری رقم بھی ناکافی تھی۔

گرفتار خواتین کو اس سے قبل لاہور ایئرپورٹ سے بھی آف لوڈ کیا گیا۔

ترجمان کے مطابق گرفتار مسافر خواتین کو مزید قانونی کارروائی کے لیے انسدادِ انسانی اسمگلنگ سرکل کراچی منتقل کر دیا گیا ہے، مزید تفتیش جاری ہے۔