گل پلازہ سانحہ، قرآنِ پاک صحیح سلامت نکل آیا، معجزہ دیکھ کر سب حیران

کراچی: شہر قائد میں گل پلازہ میں دل دہلا دینے والا واقعہ سب کو غمگین کر گیا، جب وہاں اچانک آگ بھڑک اٹھی پوری عمارت جل کر تباہ ہوگئی لیکن قرآن پاک حیرت انگیز طور پر جلنے سے محفوظ رہے۔

کراچی میں ایم اے جناح روڈ پر واقع گل پلازہ میں تیسرے درجے کی آگ پر 36 گھنٹوں بعد قابو پایا جاسکا، واقعے میں 26 افراد جاں بحق ہوئے جبکہ ہلاکتوں میں اضافے کا خدشہ ہے۔

ہفتے کی رات سوا 10 بجے کے قریب گل پلازہ کے گرائونڈ فلور پر آگ لگی جو دیکھتے ہی دیکھتے تیسری منزل تک پہنچ گئی۔ دکانوں میں رکھا قیمتی سامان، فرنیچر، اور دیواریں سب کچھ جل کر راکھ بن گئیں۔

مگر جب آگ پر قابو پایا گیا تو ایک ایسا روح پرور منظر سامنے آیا جس نے ہر دیکھنے والے کے دل سے سبحان اللہ کی صدا بلند کر دی۔

گل پلازہ سے قرآن مجید صحیح حالت میں مل گئے، مسجد میں موجود قرآن مجید کو بحفاظت نکال لیا گیا، ہولناک آتشزدگی سے متاثرہ پلازہ سے تمام قرآن مجید صحیح حالت میں نکال لیے گئے۔

جنہیں ریسکیو اہلکاروں نے محفوظ جگہ منتقل کردیا۔ ریسکیو اہلکار نے اس موقع پر ویڈیو بنائی جو سوشل میڈیا پر وائرل ہو گئی۔

 ریسکیو حکام کے مطابق گل پلازہ کے پہلے فلور پر قائم مسجد کلیئر کردی گئی، پہلے فلور پر مسجد میں کوئی شخص نہیں ہے۔