کراچی میں پولیس اور ڈاکوؤں میں مقابلہ، فائرنگ سے 23 سالہ راہگیر خاتون جاں بحق

شہر قائد کے علاقے نیوکراچی میں واقع اللہ والی چورنگی کے قریب پولیس اور ڈکیتوں کے درمیان فائرنگ کی زد میں آکر 23 سالہ خاتون جاں بحق ہوگئی۔

تفصیلات کے مطابق اللہ والی چورنگی کے قریب پولیس اور ڈکیتوں کے درمیان فائرنگ کی زد میں آکر راہگیر خاتون جاں بحق ہوگئی جس کی شناخت 23 سالہ حمیدہ کے نام سے ہوئی ہے۔

شوہر نے بتایا کہ ہم اپنے بچے کو اسپتال سے دکھا کر نکلے ہی تھے کہ اس دوران دو لڑکے سامنے سے بھاگتے ہوئے گئے جس پر پولیس اہلکار نے فائرنگ کی اور ایک گولی میری بیوی کو بھی لگی۔

انہوں نے بتایا کہ بیوی موقع پر ہی گر گئی تھی، جب کہ ہم نے اہلکار کو پکڑا تو اُس نے اپنا نام عدیل پتافی بتایا، اسپتال منتقل کرنے پر ڈاکٹر نے موت کی تصدیق کی۔

بیوی کی ناگہانی موت پر شوہر انتہائی افسردہ ہے اور اُس نے اعلیٰ حکام سے انصاف کی اپیل کی ہے۔