کچے کے ڈاکوؤں نے دو ٹک ٹاکر بھائیوں سمیت تین افراد کو سکھر سے اغوا کرلیا

سندھ میں کچے کے ڈاکوؤں نے دو ٹک ٹاکر بھائیوں سمیت تین افراد کو پچاس لاکھ روپے تاوان کیلے اغوا کر لیا۔

تفصیلات کے مطابق خانپور مہر سے تعلق رکھنے والے دو ٹک ٹاکر بھائیوں جاوید اور خالد سمیت تین افراد کو ڈاکوؤں نے سکھر سے اغوا کیا ہے۔

پولیس کے مطابق تیسرے اغوا ہونے والے شخص کی شناخت فرمان کے نام سے ہوئی ہے۔ تین مغویوں کے اہل خانہ سے ڈاکوؤں نے رابطہ کر کے پچاس، پچاس لاکھ روپے تاوان ادائیگی کا مطالبہ کیا اور نہ دینے پر قتل کی دھمکی بھی دی ہے۔

مغویوں کے ورثا نے اپنے پیاروں کے اغوا پر احتجاج کیا اور اعلیٰ حکام سے باحفاظت بازیابی کی اپیل کرتے ہوئے کہا کہ وہ تاوان کی رقم ادا نہیں کرسکتے۔

اُدھر پولیس نے سکھر سے تین افراد کے اغوا کے بعد مغویوں کی بازیابی کیلیے اقدامات شروع کردیے اور امید ظاہر کی ہے کہ جلد ہی مغویوں کو بازیاب کروا کے ملزمان کو گرفتار کرلیا جائے گا۔