کراچی میں ڈکیتی مزاحمت پر فائرنگ، قربانی کا جانور بھی زخمی، ذبح کرنا پڑ گیا

شہر قائد کے ضلع کیماڑی کے علاقے سعید آباد گلشن غازی میں ڈکیتی مزاحمت پر فائرنگ کے نتیجے میں شہری اور قربانی کا جانور زخمی ہوا جسے ذبح کرنا پڑ گیا۔

تفصیلات کے مطابق گلشن غازی موڑ پر آفتاب نامی شہری کو ڈکیتوں نے مزاحمت پر نشانہ بنایا تو اس دوران ایک گولی گلی میں کھڑی گائے کو بھی کگی۔

ڈکیتوں کی فائرنگ سے شہری اور قربانی کیلیے لائی گئی گائے دونوں زخمی ہوئء، شہری کو طبی امداد کیلیے اسپتال منتقل کیا گیا جبکہ خون زیادہ بہہ جانے اور مسلسل گرنے کی وجہ سے مالک نے لوگوں کا مشورہ مانتے ہوئے جانور کو موقع پر ہی ذبح کردیا۔

ایس پی کا دعوی ہے کہ واقعے کی اطلاع ملتے ہی سعید آباد تھانے کی پولیس پہنچی اور فائرنگ کے تبادلے میں حذیفہ نامی ملزم کو گرفتار کرلیا گیا جبکہ ملزم کا سہیل نامی ساتھی فرار ہو گیا۔

گرفتار ملزم کے قبضے سے نائن ایم ایم پستول بھی برآمد ہوا ہے جبکہ اس کا ساتھی سہیل زخمی حالت میں فرار ہوگیا۔