کراچی میں وردی میں ملبوس اہلکار شہری کو اغوا کر کے گاڑی چھین کر لے گئے

سپر ہائی وے جمالی پل کے قریب سے کار سوار نامعلوم ملزمان نے شہری کو اس کی گاڑی سے اتار کر اغوا کرلیا اور شہری کی قیمتی گاڑی لے گئے جبکہ ملزمان مغوی شہری کو گڈاپ کے علاقے چھوڑ کر فرار ہوگئے۔

 اس حوالے سے مغوی عمر کے کزن شعور نے بتایا کہ عمر کپڑے کا تاجر ہے جو اپنی گاڑی میں جمالی پل سے اپنی رہائش گاہ کیپٹل سوسائٹی جا رہا تھا کہ کار میں سوار 4 نامعلوم ملزمان جنھوں نے گاڑی پر بیلو لائٹ بھی لگائی ہوئی تھی انھوں نے عمر کی گاڑی رکوائی اور بعدازاں عمر کو گاڑی سے اتار کر منہ پر کپڑا ڈال کر اپنی گاڑی میں اغوا کر کے فرار ہوگئے جبکہ اس کی قیمتی گاڑی بھی اپنے ہمراہ لے گئے۔

کزن کے مطابق گاڑی میں موبائل فون اور پرس بھی تھا۔شعور نے بتایا کہ نامعلوم ملزمان عمر کو راستے میں تشدد کا بھی نشانہ بناتے رہے اور گڈاپ کے علاقے میں اسے چھوڑ کر فرار ہوگئے جس کے بعد عمر اپنی مدد آپ کے تحت گھر پہنچا اور اہلخانہ کو واقعہ سے آگاہ کیا جس کے بعد عمر اور ان کے والد اقبال پولیس میں رپورٹ درج کرانے کے لیے گئے ہیں۔

 اس حوالے سے مغوی عمر کے والد اقبال نے بتایا کہ ملزمان کسی وردی میں ملبوس تھے جبکہ چھینی گئی گاڑی ایک ماہ قبل ہی خریدی تھی جس میں لیپ ٹاپ بھی موجود تاہم اس حوالے سے پولیس سے رابطہ کیا جا رہا ہے جبکہ واقعہ سے متعلق سچل اور سائٹ سپر ہائی وے صنعتی ایریا پولیس واقعہ کی حدود کے حوالے سے تعین کر رہی ہے کہ عمر کو اغوا کرنے کا واقعہ کس مقام پر پیش آیا ہے ۔