سفاک بیوی نے شوہر سے پیسوں کے جھگڑے پر 3 بھینسوں اور گائے کو زہر دے کر مار ڈالا

پنجاب کے شہر فیصل آباد کے علاقے ماموں کانجن میں بیوی نے شوہر سے جھگڑے پر طیش میں آکر 3 بھینسوں اور گائے کو زہر دے کر مار ڈالا۔

پولیس کے مطابق نواحی گاؤں کے رہائشی ظفر اقبال کے چار لاکھوں روپے مالیت کے قیمتی مویشیوں کی موت کا معاملہ سامنے آیا ہے۔

ظفر اقبال نے الزام لگایا کہ اس کی بیوی نے ناراضی  پر مویشیوں کو زہر دیا جس سے تین بھینسیں اور ایک گائے ہلاک ہوگئی، جن کی مالیت12 لاکھ روپے سے زائد  تھی۔ 

درخواست گزار کے مطابق  بیوی مویشی فروخت کرکے اپنی پہلی شادی سے ہوئے بچوں کی مالی امداد کرنا چاہتی تھی مگر اُس نے انکار کیا اور پیسوں کے تنازع پر جھگڑا بڑھا اور بیوی نے یہ انتہائی قدم اٹھایا۔

شوہر کا کہنا ہےکہ واقعے کے بعد  خاتون گھر چھوڑ کر نامعلوم مقام پر چلی گئی۔ پولیس نے درخواست جمع ہونے کے بعد واقعے کی تحقیقات شروع کر دی ہیں۔