ساجد حسن کے بیٹے کا ڈارک ویب سے منشیات کی خرید وفروخت کا انکشاف

مصطفیٰ عامر قتل کیس میں منشیات فروشی گرفتار ساجد حسن کے بیٹے ساحر حسن نے تہلکہ خیز انکشافات کر دیے۔

سی آئی اے پولیس کی تفتیش میں ملزم نے انکشاف کیا کہ وہ ڈارک ویب کے ذریعے منشیات کی خرید و فروخت کرتا ہے۔

ساجد حسن کے بیٹے ساحر حسن نے گزشتہ 2 سال سے منشیات فروخت کرنے کا اعتراف کیا ہے جبکہ مصطفیٰ قتل کیس کے ملزم ارمغان کو بھی منشیات فراہم کرتا تھا۔

مصطفیٰ عامر قتل کیس میں سی آئی اے پولیس کی جانب سے ساحر حسن کو 2 روز پہلے گرفتار کیا گیا تھا، جس کے قبضے سے 50 لاکھ روپے مالیت کی منشیات بھی برآمد ہوئی۔ پولیس کے مطابق ساحر حسن کے پاس سے غیر ملکی برانڈ کی منشیات برآمد ہوئی ہے اور وہ دو سال سے منشیات فروشی میں ملوث تھا۔

پولیس ذرائع کے مطابق اس گرفتاری کے بعد بزنس کمیونٹی، بیوروکریٹس اور شوبز انڈسٹری میں کھلبلی مچ گئی ہے تاہم ایلیٹ کلاس میں گیٹ ٹو گیدر کے نام پر منشیات کا استعمال عام ہو چکاہے۔

دوسری جانب عدالت نے ساحر حسن کو مزید ایک روزہ جسمانی ریمانڈ پر پولیس کے حوالے کردیا۔